హరియాణాలో దీపావళి సందర్భంగా ఏర్పాటు చేసిన మిఠాయిల స్టాల్పై వేలాది తేనెటీగలు దాడి చేశాయి. స్వీట్ల వాసనకు ఆకర్షితమైన తేనెటీగలు వాటిపై గుంపులుగా వాలడంతో ముగ్గురు సిబ్బంది గాయపడ్డారు. కస్టమర్లు వెనక్కి తగ్గడంతో వ్యాపారికి భారీ నష్టం వాటిల్లింది. దాదాపు రూ.2 లక్షల విలువైన మిఠాయిలు అమ్ముడుపోకపోవడంతో కొన్ని స్వీట్లను స్థానికులకు ఉచితంగా పంచిపెట్టాల్సి వచ్చింది. దీపావళి పండుగ సమయంలో భారీ అమ్మకాలతో లాభాలు గడించాలనుకున్న ఓ మిఠాయి వ్యాపారికి తేనెటీగలు ఊహించని షాక్ ఇచ్చాయి. వేల సంఖ్యలో తేనెటీగలు మిఠాయిలపైకి దండులా పోటెత్తడంతో వ్యాపారికి భారీగా నష్టం వాటిల్లింది. ఈ విచిత్రమైన ఘటన హరియాణాలోని ఫతేబాద్లో చోటుచేసుకుంది.