హైదరాబాద్లో మరోసారి ఖాకీల్లోని మానవత్వం వెలుగులోకి వచ్చింది. విధి నిర్వహణలో ఉండే పోలీసులు కేవలం నేరస్థులను పట్టుకోవడమే కాదు.. ఆపదలో ఉన్నవారికి ప్రాణదాతలుగా కూడా నిలుస్తారని ఐఎస్ సదన్లో జరిగిన ఘటన నిరూపించింది. 28 ఏళ్ల యువకుడి గుండె స్పందించడం ఆగిపోయిన వేళ.. చావుకు, బతుకుకు మధ్య నిమిషాల వ్యవధిలో సాగిన పోరాటంలో ఇద్దరు పోలీసులు హీరోలుగా నిలిచారు. హైదరాబాద్లోని ఐఎస్ సదన్ ప్రాంతంలో 28 ఏళ్ల యువకుడు అకస్మాత్తుగా తీవ్ర అస్వస్థతకు గురయ్యాడు. పరిస్థితి విషమించడంతో అతడి గుండె స్పందన ఆగిపోయింది. సాధారణంగా ఇలాంటి సమయంలో ప్రతి సెకను ఎంతో కీలకం.